Diblomaasiga Rug-caddaaga Ee Cirro oo Dhoolla-tus Siyaasadeed ku Soo Bandhigay Maansoor
Hargeysa(Qaran news)-Dublamaasiga caanka, ahna Guddoomiyaha Golaha Wakiilada Somaliland Cabdiraxmaan Maxamed Cabdilaahi [Cirro] oo ay weheliyaan siyaasiyiin, Xildhibaano, ganacasato, Culimo aw-diin iyo qaybaha kala duwan ee bulshada, ayaa shalay madal il-yartu is-qabatay kaga dhawaaqay Urur-siyaasadeed cusub oo ku suntan WADDANI, kaasoo ay xubno ka yihiin dad muc’tarif ka ah Lixda Gobol ee Somaliland.
Fagaaraha uu ka dhacay dhooll-tuska siyaasadeed ee uu gadh-wadeenka yahay Md Cirro oo ka dhacay Hotel-ka Maansoor ee Magaalada Hargeysa, ayaa u muuqday mid wax weyn ka bedelay dareenkii bulshada, gaar ahaan reer Hargeysa, isla markaana si weyn kor ugu qaaday xaraaradii fagaarayaasha siyaasadeed oo muddooyinkan dambe dhedo-ku-fadhiday, waxaana xusid mudan maqalka Miyuusiga iyo Midhaha Heesta WADANI oo noqday kuwo beer-qaaday qaybihii kala duwanaa ee bulshadii madasha isugu timid, kuwaasoo marka uu dhegahooda soo gaadho Laxanka, Midhaha iyo Luuqda la-isu-xulay ee Heesta “..Waddaniga dhabta ah..” intay is-ilaabaan ay sara-joog u kacayeen, iyagoo dadka qaarkood qiiro-darteed indhahooda il-mo ku joog-joogtay.
Sidoo kale waxa isaguna aan dab-yar shidayn Guddoomiye Cirro oo runtii inkastoo aan lagu tilmaami karin shakhsiyaadka u jajaban qoobka-ciyaarka, haddana shucuurta iyo dareenka goobta yaal awgiis, waxay indhahaagu qabanayeen Cabdiraxmaan oo faro-cidi-leh u saaran sida Fanaanka Nuur Daalacay ee Heesta aynu kor-ku-soo sheegnay qaada inuu Migirifoon la baxo si uu dadweynaha ugu qaado Heesta waddani.
Intaa haddii aynu ku soo koobno islaab-qaadka shucuurta iyo dareenadii kala baadey, balse Urur-siyaasadeedka WADDANI sababta u noqday isu soo hilowgooda, waxa kaloo xusid mudan khudbadii Guddoomiye Cirro ka jeediyey madasha oo runtii la odhan karo, waxay ahayd mid Md. Cirro ku muujinayey khibrada iyo waayo-aragnimada siyaasadeed ee uu u leeyahay dhinaca diblomaasiyada, sidoo kale waxa la halmaami karin hiilkii siyaasadeed ee Md Cirro ay u muujiyeen Xildhibaanadda Golaha Wakiiladu ee uu Guddoomiyahooda ahaa muddada Lixda Sanno ah, waxaana ka mid ah shakhsiyaadka hiilka u muujiyey Md. Cabdicasiis Maxamed Samaale, oo isagoo ku hadlaya afka Shir-guddoonka iyo kan Golaha Wakiilada madasha kaga dhawaaqay hadalo iyo kelmado la odhan karo waxa ay ahaayeen hiil-badheedha oo aan geed-na loogu soo gaban, waxa iyagu-na kalmado kuwaa la mida ama aan ka dhicin madasha kaga tiraabay Xildhibaan Cali Mareexaan, Xildhibaan Cali Xaaji, Xildhibaan Buubaa, xildhibaan Aareeye, Xildhibaan Bashiir Tukaale iyo Xildhibaan Askar.
Geesta kale, waxa madasha lagaga dhawaaqay Magacyada 17-Xildhibaan oo ka mida Mudanayaasha doorashadii Golaha Wakiilada ka soo baxay Xisbiga UCID, kuwaasoo hada u goostay ama u talaabay dhinaca Urur-siyaasadeedka WADDANI. Haddaba sida Md. Cirro madasha ka cadeeyey Xildhibaan Xaashi oo dad badan iyo Xildhibaanada Golaha Wakiiladu ku xasuustaan ergadii uu ka galay khilaafkii u horeeyey ee doorashada Shir-guddoonka Golaha Wakiilada dabayaaqadii 2005-tii.
Si kastaba ha ahaatee, waxa dad badani saadaalin kari laayihiin mar haddii daamaashaadka intaa leegi u dhacay dhowaaqii ururka, balse qaabka iyo nooca uu ku dhici doonto shirweynaha 1-aad ee Ururku, kaasoo sida uu Guddoomiyaha ku meelgaadhka ah ee Ururku sheegay inuu ku qabsoomi doono muddo 90 cisho gudahood.
diyaariye wariye:kamaal xaaji faqay
oslo,norway
NEWS 
